日本好流行立食，呢個立食文化吹左黎香港呀！
講緊既係位於中環半山既扒房 「Metal Steak」。
雖然話係立食，但都有高櫈可以坐既，你鐘意既話可以企的 (笑)。
一入到店內已被濃濃既燒肉味吸引住，
喺門口位置店員會為客人介紹每款牛/豬，價錢亦有不同，
並且以每克計算，由200克起計，女仔多數200-250克就夠，
男仔大約300-450克啦！睇下有幾大食囉 (爆)。
怕唔夠飽可以加$30，有湯、飯 & 沙律，亦可加錢叫埋飲品添。
order時喺門口有個窗口仔，只要同店員講要咩牛 & 重量，
要幾多成熟，要否跟餐等。店員會即時切割塊牛，
之後有張單去俾錢，俾完錢就可以搵位坐，
店員會送餐的，唔洗自己攞架。
店內有2層，全部都有高檯同櫈，
檯上放滿調味醬汁俾客人自己選擇，餐具都係喺檯面，
牆上有膠圍裙，係好鬼自助架。
今晚我地2個女仔食，心大心細想食佐賀A4和牛/安格斯牛，
又想試下黑毛豬，唉...選擇困難症又發作，
最後叫左200克佐賀A4和牛西冷，
同埋200克黑毛豬 (其中一個跟餐)。
鉄板上叫左3成熟就夠啦，黎到已經5成，岩岩好，
上檯果陣燒烤味香到呢...而鉄板上既配菜有粟米、洋蔥、露筍等。
西冷肉質頗嫩，燒過後仍然保留住肉汁，入口有點溶化既感覺，
但仍然係有咬口的，個人比較中意A4多過A5，
因為冇咁油膩冇咁漏，多食都唔覺膩。
多心既我仲叫左西班牙黑毛豬，店員建議3成熟，
我地仲跟左餐添。雖然係3成熟，鉄板上到黎仍然見到粉紅色，
但切好後已經岩岩好熟了。
3成...真係3成就夠，唔洗怕唔熟，靚靚黑毛豬最好係3至5成熟最好味，
咁先保存住肉汁，肉質軟腍嫩滑，唔會食到鞋口鞋面 (爆)，
配埋檯上既黑醋汁，可帶出橡果果香添。
整體黎講今次係好新既體驗，多數喺日本先會咁樣order同立食，
喺香港比較少有喔，同埋好有新鮮感囉，想食幾多就order幾多，
全部自己話事，且店員服務細心，好nice啊！
♥ Thanks for reading ♥
Find me for more update :
♥ Blogspot ♥ She Blog ♥ Beauty Exchange
♥ theZtyle ♥♥ Qooza Beauty ♥ Youtube Channel♥
沒有留言:
發佈留言