2013-07-26

另類甜品選擇 @ 甜牙牙

甜品...可以話係我的最愛, 基本上正餐食到好飽,
但食甜品依然可以食得落。不過, 有D甜品係非常飽肚,
建議唔好食正餐, 直接食甜品就夠啦。
講緊係咩甜品咁飽 ??? 就係窩夫、pancake類甜品囉。
 
 
今次再一次黎到位於尖沙咀既「甜牙牙」,
係啊...我唔係第一次黎架啦, 之前黎過一次係食窩夫,
不過呢...上次感覺唔係太好, 因為d窩夫令我有點失望。
我覺得整得好既窩夫, 最緊要熱, 有香濃牛油味帶出麵粉既香,
入口唔可以好乾, 要面層少脆, 裡面鬆軟, 咁先為之好味。
 
 
由於我知道自己唔中意食呢到既窩夫, 所以揀左比較特別D既甜品試試,
「阿拉斯加火焰雪山」$68, 話明係火焰, 一定有少少酒精點下火, 再淋上面啦 !
我係單睇外表喺MENU入面揀既, 因為佢外表算係吸引嘛 (笑)
 
 
店員同我地講, 製作需時, 可能要等20分鐘, 我當然冇問題啦,
只要落單時講明就OK了, 不過, 我地等左10分鐘就見到真身啦,
賣相同MENU的一樣, 冇走樣, 整得好靚啊 !
店員喺我地面前示範點火, 見佢點左幾次都唔著火都替佢擔心,
好彩最後都成功了。好啦...睇我切餅儀式啦 XDDD
 
 
面層白雪雪既係蛋白加糖打成的, 入口都未算太甜,
可以接受的甜度, menu上見到係用橙酒點火成火焰,
但我又食唔出有橙味噃, 不過都唔係咩重點黎既。
中間有d 咩呢...就係cream、生果、雪糕, 仲有少少窩夫添喎,
不過今次既窩夫比上次好d, 因為有大量cream、雪糕令佢軟身左,
所以入口時唔會好乾。整體黎講, 呢個火焰雪山我覺得唔錯,
有蛋白花、cream、雪糕既軟滑, 又有窩夫既咬口,
加埋新鮮生果同朱古力醬點綴, 成個甜品都好豐富,
最重要係佢冇落太多酒, 否則一定大打折扣。
 
 
另一款係「芭娜娜提拉米蘇pancake」$49, 呢個真係抵食夾大件啊,
好後悔食飽飯先去甜牙牙, 因為食兩個咁有份量既甜品真係會勁勁勁飽架。
呢個pancake我地都係等左15分鐘左右, 一上檯, 嘩, 好似好好味咁喎,
只睇入表就好掂啦, 唔知食落又係點既呢, 哈哈。
 
 
切開一睇, 共有兩塊pancake夾住一片片既香蕉, 同埋香蕉蓉,
仲有marscarpone cheese, umm...好香好軟, 老實講,
pancake比窩夫好食好多, 絕對唔覺得佢乾, 而且有兩種不同既香蕉喺入面,
增加左口感, 加埋cheese, 簡直係...BRAVO...好味,
不過呢個pancake我建議4個人食好d, 因為可以有空間再試其他甜品吖嘛,
呢晚我地兩個女仔食, 好勉強都食唔哂 xddd
 
 
拿拿拿...又一眼闊肚窄實証啦, 兩個人叫兩個咁有份量既甜品仲唔夠,
仲要叫多個xdddd「法式焦糖燉蛋」$32, 以呢個價錢黎講算大size啦,
我自己平時食唔中意太多糖,  今次一下子唔記得叫少糖,
就真係好甜啦, 雖然焦糖好香, 不過太多會好漏啊 !
第一啖入口好香蛋味奶味, 做得好滑, 質地就好似林左少少,
不過都ok既, 中意食cream brulee既朋友可以試試喔 ^^
 
 
當晚我地大約8:30去到, 人客未算多, 所以唔洗等位, 如果過左9:00去,
就可能要排隊等位啦。店員會提供清水俾客人, 這點值得一讚既,
 如果店員唔記得俾, 你直接問佢攞就可以了。
講真, 如果香港既雪糕店、甜品店都肯做多少少,
送上一杯清水俾客人就好啦。
 
 
 
Thanks for reading

Connect with me for more update :

 
Blogspot   Youtube Channel   
 
Fan Page   Facebook

 
 
承接任何新娘化妝,姐妹化妝,宴會化妝,雜誌化妝等。
歡迎 E-mail 查詢/預約 chrisc.makeup@ymail.com

沒有留言:

發佈留言