給我驚喜的小王子

話說我係第一次去同小王子見面，心情難免有d緊張，

我怕佢d野唔好食 (爆)。當晚大約係9:30左右去到啦，

好彩人唔算好多，所以唔洗等，但15分鐘後就好多人喺門口等啦！

一向都鐘意食窩夫既我，一睇menu就鎖定目標，

一定要食呢個士多啤梨杏仁片窩夫配士多啤梨雪糕。

果然不出我所料，窩夫好香牛油味，面脆內軟，

配合埋佢地自家制既士多啤梨醬，簡直不得了，

喜歡佢唔太甜而且唔係太人造既士多啤梨味，

老實講，一個人食哂都得，不過要留肚食第2款 (笑)。

本身心大心細想食金寶萍果，見隔離檯果個都幾大喎，

有擔心食唔哂架，不過又俾佢勁香既牛油味吸引住，

唉...死就死啦！食埋今餐先減啦 (爆)。

真係唔厄你，面層果d脆脆勁香牛油味，第一啖食到我眼凸，

太好味啦...好香啊！瘋狂食左幾啖後發現...好甜...太甜啦！

如果少d甜會吸引好多，冇咁快膩，可以食多幾啖吖嘛。

入面既萍果唔算多玉桂味，好彩啫...我麻麻地鐘意肉桂，

面層脆脆雖然甜，好彩入面既餡甜度剛好，稍微中和返少少啦！

兩個人叫3個甜品，嘩...太過份啦，呢個芒果涼粉麻麻地啊！

有d怪味，同平時食既涼粉有d唔同，但又唔似變壞左喎，

唔知係咪咁既原因呢， 搞到d花奶都冇乜奶味，一整個唔想食啊！

  

♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com