一年一度寶貝女生日，揀左呢間傳說中好好食嘅日本料理，
講真係幾期待㗎，我地唔打算食鉄板，
所以就揀左坐sushi bar果邊，可以睇住師傅為我地整出美味壽司。
我地3個人叫左3個餐，其中一個係鉄板系 （笑）
無論乜系都有前菜俾大家爽下口開個胃咁嘅，
我地仲叫左一碗魚子俾壽星女，因為佢極愛魚子，
見到脹卜卜就知新鮮啦。
由於食得太開心，所以打亂哂黎講啦～
盡量記到就講啦。。。哈哈
鵝肝多士。。厚到呢，又大又厚，雖然唔主張食鵝肝，
但阿女幾年冇食過，就俾佢嚐一嚐啦！講真食完都幾漏，
外脆內軟加埋少少甜甜地嘅汁，好味。
除左鉄板餐，我地叫左2個餐升級可以食龍蝦剌身，
嘩。。。好大隻好多肉，仲好鮮甜爽彈，而家講起都想食啊！
食食下師傅好好人啊…佢知道阿女生日即場開隻生蠔送俾阿女食，
超級大隻，口感唔係creamy的，係比較爽，
而且好鮮甜 （我唔食生蠔，轉述阿女食後感）
跟住就有壽司同幾塊剌身，師傅即場喺你面前整，
menu上係冇講有咩食，都係睇當日有咩新鮮食材就整㗎啦！
當晚最好味壽司係金目鯛、燒泰刀魚、
隻牡丹蝦，諗起都流口水。
再黎就係鉄板A5和牛，5成岩岩好，睇到中間粉粉紅嗎？
嘩。。。好味啊！不過我都係食得唔多，因為油花太多，
我會好漏，但牛牛就好軟好稔，入口即溶。
仲有燒喜知次魚，個樣幾有霸氣，唔好以為好多肉，
其實薄薄的一層好嫩好滑，冇魚腥味，唔錯。
仲有2碗湯，白麵豉 ＆ 龍蝦湯，清清地好正，
其實仲有碗炒飯，但唔記得影，講真，真係超級飽啊！
最後食到肚皮都撐爆，師傅攞出一個自制果盆出黎，好驚喜啊！
靚到唔捨得食啊～好感動，就算菠蘿係酸嘅都變甜啦！（笑）
雖然我地booking時冇講有人生日，但師傅得知阿女生日，
專登同廚房講，好彩當晚人唔太多，
所以就整左個生日甜品出黎，好好味嘅燒丸子啊！
真心好滿意呢一餐，環境、食物、服務、人情味，
一切種種都令我地過左愉快的一晚，讚。
♥ Thanks for reading ♥
Find me for more update :
♥ Blogspot ♥ She Blog ♥ Beauty Exchange
♥ theZtyle ♥♥ Qooza Beauty ♥ Youtube Channel♥
沒有留言:
發佈留言