突然心血來潮想食和牛，上網搵下見到呢間，
係啊……冇人介紹我黎食，純粹自己睇食評咋，
地點係好方便嘅尖沙咀，食完仲可以行一陣買下野又得。
店內裝修精緻，環境舒適又寧靜，朋友多可以一間房，
就算2-3人都有卡位坐，私隱度算高，
最重要係唔嘈又唔大油煙，抽風做得好好啊！推薦拍拖嚟食 (笑）
一坐低就梗係睇下有咩岩食啦，吃貨就是這樣練成的，
服務員好親切，會話你知當日有咩精選，
你想食乜佢會介紹俾你，岩哂選擇困難症嘅我。
最後揀左呢個純特選和牛肉眼盛合 $780，
有特上日本產和牛肉眼、和牛排肉、牛舌及小排肉。
以呢個價錢2人份量，牛肉都算多啦！
怕唔夠飽加碗白飯就夠啦！要知道日本米又幾香，
分分鐘要爬兩碗（爆）
呢盤和牛真係好乸正，油脂分佈平均，牛味香濃，
輕輕燒佢幾秒即食，燒太熟就浪費左啦，每見到啲油劈啪劈啪咁響，
我就忍唔住夾佢上嚟，再直送我個胃。
嗱。。。我又點會放過機會，有大食大先得㗎，
再追加日本產山形阿信豚腩肉 $108，
嘩，燒到啪啪聲有啲燶邊份外香口，
又唔覺得肥膩，好好味啊！
因為牛舌薄切太好味啦，所以又追加一碟，
其實咁薄輕輕燒下就食得，加少少海鹽伴住食更加帶出牛香。
我唔中意厚切牛舌，感覺有點嘔心，
講個秘密你知，我以前係唔食牛舌㗎，經過多番練習，
我終於接受到啦！不過只限薄切。
由於燒到個人好興奮好熱，所以叫左2杯冰凍soda，
但已經唔記得咩味，好似有一杯係青蘋果 （笑）
最後梗係以雪糕作結啦，菠蘿雪芭像真度極高，
唔太甜正啊，柚子雪芭好細杯而且偏甜，我麻麻地中意，
另外南瓜雪糕最抵食，因為最大杯，南瓜味唔係好濃，但奶味出色。
♥ Thanks for reading ♥
Find me for more update :
♥ Blogspot ♥ She Blog ♥ Beauty Exchange
♥ theZtyle ♥♥ Qooza Beauty ♥ Youtube Channel♥
Email : chrisc.makeup@ymail.com
沒有留言:
發佈留言