輕盈不油膩的修護 x System Professional奢華修護美髮油

經常染燙髮絲, 造成乾旱、分岔、受損,

髮絲結構基本上會被化學成份破壞,

無論是多名貴的染燙產品, 或多或少都會損害髮質,

令髮絲看上去像雜草一樣沒有光澤。

我這個經常染燙的女子, 頭毛一定不會是健康有光澤啦 !

加上天生毛燥, 在潮濕天氣更是嚴重難搞,

謝謝公關送來System Professional奢華修護美髮油 ($178/30ml),

好讓我在家享受殿堂級護理 (笑)。

美髮油含天然植物精髓, 當中堅果精華有液態黃金之稱,

高效滋潤。而杏仁精華質地輕盈, 全面保濕鎖水及修後角質層。

荷荷巴精華適合脆弱乾旱髮尾。

加上突破性「輕盈轉換技術」, 令美髮油快速被吸收,

提升髮絲亮澤感及減少毛燥。

因為有了「輕盈轉換技術」, 美髮油質地相當清爽,

不像一般髮尾油般油膩, 所以塗後髮絲不會過重,

而且打kick的頭髮變得更易梳理。

那淡淡的香味, 很難形容, 好像是花香吧,

每次塗後心情更靚, 就是有舒緩的感覺啦。 

話不多說, 有圖有真相, 之前髮絲受損頗為嚴重吧,

加上長期懶惰沒去焗油護理, 情況更是慘不忍睹 (泣)。

SP的美髮油可於濕髮或乾髮時使用,

每次2-3滴, 即時為髮絲補水急救。

更可於吹髮前塗抹於濕髮, 形成隱形保護膜,

避免風筒熱力造成的傷害, 同時可塑造髮型線條,

增加亮澤感之餘, 令質感更完美。

SP美髮油細細支, 所以我會帶住出街,

可隨時隨地滋潤我的髮絲喔。

使用了短短2星期, 由剛開始的乾旱分岔及毛燥,

變得細緻光澤及柔軟, 功效顯著。

最重要是不油膩配方技術, 不會令髮絲看似油笠笠,

好像很久沒洗頭的瘋婦一樣嘛。

「產品由相關品牌提供試用」

 ♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com 

融入法國的浪漫 @ Restaurant Akarme

2月係我既台慶月，朋友請食飯一定賞面出去既，

今次特地過海去到灣仔Restaurant Akrame，

就係要浪漫一下，品嚐新派法國菜啦。

Akrame巴黎總店喺2014年得到米芝蓮二星架，

餐廳裝潢唔算華麗，反而覺得坐得幾舒服，

二人世界既話很不錯呢。(笑)

我地點左4道菜，客人唔會知道食d咩，

黎到就會有驚喜，我都十分期待啊！

首先有麵包加牛油，而上枱既麵包仲係微暖的。

餐前小吃有橄欖脆片、芝士薄片夾銀魚、同埋三文魚籽苦白菜。

賣相真係夠哂可愛，可能我本身唔中意食魚籽，

食左一粒覺得好腥 (爆)，脆片就好鬆脆，咸咸香香的都幾得意。

頭盤有來自日本既菇，將蛋白加菇菇打成泡沫，

食落有d蛋既粒粒，又似棉花糖咁，質地好得意，而且菇味香濃。

主菜方面有安康魚，首先廚師用醃料將魚醃好，

再用以黃薑粉特制既香蘿蔔包住件魚，

加上特別配制既法式醬汁，口感豐富，

而且不愛好食魚既我都唔覺得有魚腥味，好好味啊！

碟邊果塊橙色東東，係蘿蔔黎架，面層果片仲係酸酸地，好開胃架。

食完個安康魚就要refresh一下味蕾，廚師用左柑黎做呢個sobert,

 入口好滑，即溶既感覺好清新，

可以讓味蕾繼續享受接住落黎既驚喜菜式。

接住落黎就有黑毛豬柳，以耶路撒冷醬汁搭配，

我唔知咩係耶路撒冷汁，不過係有黑醋既酸甜味，

豬柳肉質嫩而且好juicy，旁邊係烤過既小薯仔，

用洋蔥打成蓉，加埋香脆蒜片，教我如何不愛它。

進入甜品部份，首先有Hazel Nut雪糕，

面層果塊係焦糖脆片，好香既Hazel Nut味，入口creamy，

底部仲有溶左既焦糖，加埋用酒浸過既梨，口感一絕。

呢件黑猛猛既甜品係食用炭整出黎架，中間係mousse狀，

入口即溶兼且苦苦地，不過加左中原一點黃既熱情果醬，

剛好中和左苦澀味，而外層圍住果塊脆片係有薄荷味的，都有中和苦澀味既效果架。

最後出場就有Light Tiramisu，共有3層口感，

第一層用mascarpone cheese打成泡沫，

第2層係有酒味帶甜既蛋糕粒粒，

最底果層係coffee jelly，有dd苦，

不過整體黎講做得好好，感覺好特別，有驚喜。
勁中意甜品既我，覺得3款甜品都好出色，大愛 (╯з╰)

如果係生日既話，訂枱時講聲，

就會有sea salted chocolate請你食架啦！(笑)

旁邊既檸檬蛋白脆餅更令我一試難忘呢！
食完3款甜品，好滿足地就畫上完美句號啦！

 

♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com 

      

牛一之燒肉盛宴 @ 正道和牛燒肉店

呢一篇食評真係拖左好耐，話說係小妹2月牛一既生日飯黎既，

鬼整我懶到咁而家先寫 (爆)。
好啦，入返正題先，牛一想搵間唔好咁多人，

坐得舒服既日式燒肉店，朋友介紹我銅鑼灣「正道」，

預早book位，去到唔流洗等，冇乜人直頭好似包場咁樣，正啊！

呢一餐我地都食唔少野架，小食有一口炸芝士，

嘩...唔係講笑，好好味，粉漿唔厚唔油，

入面熱辣辣仲有好香濃芝士味，一
碟得4粒，少左d喎 (爆)。

仲有櫻花蝦海藻沙律，爽口既海藻配以酸酸地既醋，

加埋櫻花蝦既鮮味，好fresh好開胃啊！餐前食呢個很不錯。

我地仲叫左一板馬糞海膽，睇顏色就知道一般啦！

好彩都冇話唔新鮮到變苦，都仲算甜既，

所以話食海膽呢家野真係撞彩架。

燒肉店除左食肉，都要燒下海鮮既，

呢盤正道海鮮拼盤算唔差啊！有大海蝦、帶子、

蟹腳、鮑魚，其實仲有岩蠔架，不過我地唔食，

轉埋做帶子囉。最好味就係大海蝦，

d肉好爽彈，有淡淡海水味添。

帶子都唔錯，大大隻好鮮甜，加埋牛油一齊燒，

加強左鮮味，正都喊啊！

燒海鮮或者五花腩時，加埋呢d櫻花海鹽，

包你快活過神仙 (笑)

食d咁熱氣又濃味野，一定要飲凍野架啦 (￣∇￣)，

柚子、荔枝soda都好正，即時降火啊喂 (笑)

肉類方面有日本產雞腿肉 (麵豉醬)，雞肉鮮嫩，

唔係醃到冇哂雞味又梅哂果隻，燒到金黃色，入口太香啦！

日本產黑豚五花腩，肥瘦適中，一層肥一層厚，

燒到油花出左到金黃色，放入口，

嘩...口感滿分，又唔油膩，好味道。

不得不提呢個薄燒牛舌，真係極度欣賞，

其實我之前唔食牛舌架，而家練習到食薄燒，

厚燒仲係未刻服到囉。呢個薄燒正到呢，加埋d葱，入口冧爆啊，

葱既爽甜加上牛舌既濃郁味道，我甘拜下風。

最後叫多個鹿兒島A5肉眼，講真，我有d怕太多脂肪既牛，

如果俾我揀我中意食A4多d，起碼放入口唔係好似食脂肪成口油咁，

但因為冇A4，所以就叫左A5囉, 太漏啦！

我食左一件就收左皮了。(爆)

呢一餐3個人食埋單好似差不多2000，

其實胃口唔太大既可以叫少d，不過我屋企2個大胃王，

食少d都唔得啊。。哈哈！ 


       

♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com 

 

韓燒之選 @ 韓流村

       

都有成個幾月冇食韓燒啦！

今次朋友介紹，帶左我去尖沙咀既韓流村，

入到去裝修好簡單，感覺好似好岩年輕人聚會既地方。

枱面上有呢d前菜，洋蔥同蒜片應該係加入生菜同肉包住食，

斷估唔會空口就咁食掛 (笑)

我地加左10蚊雞芝士，嗱...唔好以為10蚊好少芝士啊，

其實都好多架，加埋蛋醬...想像到嘛？芝士控一定勁中意囉 (^_-)

我個人覺得個蛋半生熟，芝士又溶左果時食最好，

又香奶同芝士味，又滑喎！想香口d就等多陣，

又會有唔同味道架，不過我建議大家快d食哂，

因為d燒肉既油會流到去d蛋到，到時就食到一口油架啦，

仲肥上加肥添 (爆)

老老實實，全晚我最欣賞係呢碟醃左既牛排骨，

肉質好嫩，雖然醃過，但牛味冇被醃料蓋過，好正啊！

加d面豉醬，用生菜包住食，感覺冇咁油膩，

可以食多d肉，唔用菜包住好快飽架，

呢個牛肉肉質好嫩好香牛味，推介 (￣∇￣)

另外又點少得五花腩吖，一層肥一層瘦，燒到佢d油出左，

d皮脆脆的煙煙unun的，點麻油唯鹽一流。

黑毛豬脖肉，即係豬既頸同膊頭之間既肉，成塊豬扒咁囉，

唔好以為咁厚要燒耐d啊！要燒到剛好熟有d金黃色就食得架啦，

過左火會好乾好硬，燒得岩時間既話肉質好林同好juicy架 (^_-)

另外仲有豬皮，其實我唔係好熱愛食豬皮，

不過都試左幾塊仔，店員話點黃豆粉食，我唔中意囉，

感覺實在好怪又唔好食，我都係點辣醬+麻油正好多 xddd

打卡或讚好會free飲品，我地就free左梨汁同烏龍茶啦，

2人埋單600幾，都唔算好貴，中價位晚餐啦！

最唔好就係抽油煙唔夠強，食完全身加頭髮都好勁油煙味，臭到爆燈 ~~~


                 

♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com 

休閒日式午餐 @ 雲海

星期六午餐食乜好呢？相約好姊妹又唔想等位，

想傾密計又唔想嘈嘈閉，於是就揀左雲海吔個lunchy啦！

我點左鉄板薄燒和牛set，姊妹就點左汁燒牛扒set (但我冇影佢相 xddd)

個set都幾豐富架，有salad，菠菜同魚生 (╯з╰) 。

唔好講咁多，多吃蔬菜身體好，bangbang聲吔哂d菜先，

魚生都好新鮮，賣相亦一流啦，全部K.O.左先 (爆)

薄燒和牛5成熟，燒得岩岩好，最中意佢冇好多葱、蒜包喺入面，

有時太多葱蒜又食唔到牛味吖嘛，仲要食完個口勁大陣味添。

其實呢個餐真係好多野食，最後仲有碗炒飯添，

係啊...仲有麵豉湯 (冇影相)，不過唔知係咪吔得太飽，

個炒飯雖然炒得乾身冇乜油，但唔覺得好食噃，硬係爭d野咁，

我又講唔出。Any肥，呢餐2個人埋單900幾，

有wine & dine卡75折，抵好多。

 

♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com 

再訪咖啡弄

           

呢一日約左朋友食晏，由於我係無業遊民，

所以預早去搵位係我強項 (爆)，大約12:30我就到左啦，

完全唔洗等位，輕輕鬆鬆坐埋去等食 (笑)

朋友仲未到，我唯有點住杯野飲下先啦，

呢杯蜜桃冰茶甜度剛剛好，我最怕甜到甩肺既野，

好彩我唔記得叫少甜都唔係好甜咋，茶味亦好出。

一放喺我面前，上面幾粒蜜桃即時俾我K.O.左，

其他裝備水果我就冇搞到，由佢做裝飾好了 (^_-)

朋友一到，即刻叫左熱水果茶，我直覺話我知呢杯野應該好很甜，
同埋感覺有d假，any肥我唔會叫囉，
賣相又真係幾靚既，但都係吸引唔到我。

我地2個女仔點左2份三文治，呢份玉米里肌起司可頌，

已經係食左N次，食唔厭，厚厚既火腿，

加上我最愛既煙肉、芝士、粟米，真材實料，

口感豐富，下次再去都一定要食，番兜再番兜 ToT

另外我地仲叫左芥末培根三文治架，一碟有3件，

不過我衰，唔記得影相，一貫咖啡弄作風啦，

大大份，真材實料，好多餡，多到成件三文治好厚，

個口要好大先得 xddd，最後我地都食剩一件，

實在係太飽啦 (笑)

♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com 

清新的花蜜香味 x Honey Granny

  

之前好多人搶住食既Honey Granny，

我終於喺唔洗排隊既情況試左啦！

揀左九龍城廣場果邊，貪佢人比較少吖嘛。

店內裝修簡約且非常光猛，有幾部ipad俾客人邊食邊玩，

不過對我黎講作用不大，不如free wifi仲好啦！

店內雪糕亦唔算貴，平均30幾蚊有交易，除左牛奶味之外，

仲有奶茶味添，落單時望望牆上既相片，

就可以更快更清楚知道自己想要食咩，

對於選擇困難症既我岩哂 (笑)。

我點左原味蜂巢， 頭幾啖都覺得好香好清甜花蜜味道，

但食多幾啖就好甜好漏啦！大概食到半杯已經頂唔順，

可能我唔愛太甜既東東吧。

果細細塊蜂巢咬落有渣，雪糕牛奶味唔重，

亦唔算好滑，比M記的好 (爆)，整體配合還可以，

不愛太甜的朋友，可以如叫少honey應該會好d 😊

除左即食雪糕，我見店內有賣蜂巢、蜂蜜、爆谷添架。

       

 ♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com