♥ Chris.C Makeup Artistry ♥: 約會在Seoulmate

2015-10-14

約會在Seoulmate

自從地鉄通車到西營盤果邊之後，好多老店都換成潮食新店，
西環舊區變天，食客們都覺得方便左而選擇黎西環搵食。
今次黎到第三街，就係要感受下韓色cafe既氣氛，
靜靜地同朋友傾下計。

喺門外已清楚睇見店內裝修擺設，店仔細細有開放式廚房，
而檯櫈都擺得幾密吓呀！
不過店內有一扇門，推門而入就係一個花園仔，而家秋高氣爽，
拍拖談心都係不錯之選，夏天太熱冇冷氣就免啦(爆)。
可惜我去果時係夜晚，又落雨，所以冇影相啦！

我地揀左門口窗邊檯，可一邊欣賞街景一邊傾計喔！
Cafe內以輕食、甜品為主，我地食完晚餐搵甜品食，
叫左個韓冰雪系列，要蜂蜜柚子芒果，而且係季節限定，
相信冬天應該冇芒果吧。

嘩...一上檯，好靚啊！好韓啊！好驚喜啊！
正當我向下掘d冰時，發覺冰粒都幾大，當興奮地放入口時，
有點失望，d冰係冇味架，唔係我期待既牛奶味，
但優點係冇咁肥囉，因為材料(椰果、芒果)唔多，
有淡淡柚子醬陪襯，on top有個柚子雪芭，
味道較酸，整個冰可以話係好普通 -_-#

食冰一定要飲杯熱野平衡返先得，叫左杯薑柚茶，
暖暖口腔暖暖胃，讓收窄左既氣管放鬆返，剛好姨媽探訪完，
薑既飲品都係好好吖。呢杯薑柚茶唔會死甜，甘甘甜甜的，
但薑味令佢有點苦澀，但可接受的。
整體黎講店主善用吋空間裝修這小小cafe，有韓式小店風格，
食物飲品款式都算多，不過當晚播既歌唔係韓文歌，
而係廣東/國語歌，仲要係80年代果隻，有點格格不入 (笑)。