全雞脾藥膳雞煲補一補 @ 尚上下夏 - 養生雞煲火鍋

雞煲就食得多，藥膳雞煲加埋全脾上就第一次啦！

講緊既係尖沙咀尚上下夏養生雞煲火鍋囉！

今次2人進店，諗住姨媽走左就補一補 (笑) 。

不過店內樓底矮又細，所以坐得唔係好舒服同埋好嘈，

係嘈到有d頭暈添。

叫左個鴛鴦湯底，一邊藥膳，一邊麻辣(少辣)。

全雞脾當然唔係成隻上啦，切左件既，仲要去埋骨添，

食果時又嫩又juicy，啖啖肉正到爆，雞煲汁杰味濃，

係偏甜既雞煲，唔會越食越咸，

而且少辣對於唔係好食辣既我黎講岩岩好唷。

不得不提煲內配料，除左我最喜愛既洋蔥，

仲有堅係入味既豬皮添，真係搶住食架唔係講笑。

如果你飲開藥材煲既湯，相信你唔會抗拒藥膳湯底，

因為苦中帶甘，我飲到當歸味，否則你會覺得苦苦地又怪怪地咁。
麻辣湯果邊麻中帶辣，越食越刺激啊！

食到咁上下加湯啦，點左招牌四寶丸(貢丸、芝心丸、辣牛丸、墨魚丸)，

我唔食貢丸既，全部由朋友搞掂，芝心丸都幾好味喎，

入面d芝士溶溶地，芝士味都幾出吖，辣牛丸又幾鬼辣，

仲好彈牙添，唔錯啊！墨魚丸反而就普通啦，

冇乜特別喔！全部太丸都爽彈架。

今次唔食牛啦，叫左兩款豬，呢款係頂級花腩片，

我嫌佢切得太厚，切到紙咁薄會好食d，切厚左要灼耐d就會鞋少少啦！

另一款係特選黑豚肉，嘩...呢碟野真心好唔掂，

鞋過紙皮，又冇乜豬肉味，都幾難哽哂一碟 (泣)

另外就帶黑柏葉啦，每次火鍋我多數會叫，

好多時我叫佢做抹檯布 haha...其實似車房果d布多d (大爆)。

即炸芋頭條，放湯後溶溶地就最好味。

冰豆腐係我朋友點既，但我真係麻麻地中意豆腐，

食左半件淺嚐幾口，都唔覺得好好食，但索哂d湯又幾正既。

仲有金菇同皇帝菜冇影相，主要用黎索湯食，

金菇配麻辣湯果邊好味，而皇帝菜就配藥膳果邊好味d。 

                 ♥ Thanks for reading ♥   

 Find me for more update :

♥ Blogspot  ♥   She Blog ♥ Beauty Exchange  ♥ theZtyle ♥

♥ Qooza Beauty ♥  Youtube Channel♥ 
♥ Fan Page  ♥ Facebook ♥ Instagram ♥
Email : chrisc.makeup@ymail.com